ཚེ་དབང་རིག་འཛིན་མཆོག་ནི་ཕྱི་ལོ་ ༡༩༨༢ ཕྱི་ཟླ་ ༡ ཚེས་ ༡༥ ཉིན་བོད་ཤར་ཕྱོགས་སྨར་ཁམས་ཡུལ་དུ་འཁྲུངས། ཕྱི་ལོ་ ༡༩༩༢ ལོར་ས་གནས་སློབ་གྲྭར་བོད་ཡིག་འབྲི་ཀློག་སོགས་སྦྱངས། ཕྱི་ལོ་ ༡༩༩༤ ལོར་རྒྱལ་ཁྲི་དགོན་དུ་ཆོས་སྒོར་ཞུགས་ཏེ་སྐྱབས་རྗེ་གོ་ན་པཎ་ཆེན་སྐུ་མདུན་ནས་རབ་ཏུ་བྱུང༌།
ཡོན་ཏན་རྒྱ་མཚོ་མཆོག་ནི་ཕྱི་ལོ་ ༡༩༨༥ ལོར་ཁམས་སྡེ་དགེ་འབྲི་ནུབ་རོང་གསུམ་གྲོང་སྡེ་རུ་ཡབ་རྡོ་རྗེ་དགྲ་འདུལ་དང་ཡུམ་བདེ་ཆེན་སྒྲོལ་མ་གཉིས་ཀྱི་སྲས་སུ་འཁྲུངས། དགུང་ལོ་གཉིས་ལ་སོན་པའི་སྐབས་སུ་ངོར་ཁང་གསར་མཁན་ཆེན་ངག་དབང་མཁྱེན་བརྩེ་ཐུབ་བསྟན་སྙིང་པོ་མཆོག་ཉིད་ཀྱིས་སྐྲ་ཕུད་བྲེགས་ནས་རབ་ཏུ་བྱུང་ན་དགེ་ཞེས་ལུང་བསྟན་གནང་བར་བརྟེན།
ཀུན་བཟང་རྒྱལ་མཚན་མཆོག་ནི་ ༡༩༨༥ ལོར་ཁམས་སྟོད་ནང་ཆེན་སྡོམ་པའི་ཆང་ཟོམ་ཐང་དུ་ཟོ་ཆེན་བཱཻ་ཚང་ཞེས་པའི་འབྲོག་ཁྱིམ་ཞིག་ཏུ་སྐྱེས། རང་ལོ་བརྒྱད་ཙམ་ནས་ཁོང་གི་དྲིན་ཆེན་ཨ་མྱེ་འཇམ་དབྱངས་བློ་གྲོས་དང་སྤུན་མཆེད་བདེ་རབ་གཉིས་ཀྱི་མདུན་ནས་ཡི་གེ་འབྲི་ཀློག་སོགས་གནང་བའི་གོ་སྐབས་ཐོབ།
ཚེ་དབང་དོན་གྲུབ་མཆོག་ནི་ཕ་བསོད་ནམས་བསྟན་འཛིན་དང་མ་ཚེ་རིང་ལྷ་མོ་གཉིས་ཀྱི་བུ་རུ་རྒྱ་གར་བྱང་ཕྱོགས་ཧི་མ་ཅལ་སྤྱི་ཏི་རུ་འཁྲུངས། ཕྱི་ལོ་ ༡༩༩༥ ལོར་ཀ་སྤུག་ཟངས་མདོག་དཔལ་རིའི་དགོན་པ་རུ་བླ་མ་འཆི་མེད་ཀྱི་མདུན་དུ་གཙུག་ཕུད་བྲེགས་ནས་རབ་ཏུ་བྱུང་། ལོ་ལྔའི་རིང་དགོན་པ་དེར་འབྲི་ཀློག་དང་སུམ་རྟགས་དག་གསུམ་སོགས་སྦྱངས་པ་མཛད།
བདུད་འདུལ་རྡོ་རྗེ་མཆོག་ནི་ཕྱི་ལོ་ ༡༩༨༧ ལོར་མཐོ་སྒང་དུ་གཞུངས་དཀར་ཚང་ལ་འཁྲུངས། ཕ་མ་གཉིས་ཀྱི་རྩར་ནས་ཡི་གེར་བསླབས། ཕྱི་ལོ་ ༢༠༠༥ ལོར་འཕགས་ཡུལ་རྫོང་སར་བཤད་གྲྭར་ཞུགས་ནས་ཡོངས་ཀྱི་དགེ་བའི་བཤེས་གཉེན་མཁན་ཆེན་ཀུན་དགའ་དབང་ཕྱུག་དང༌། རྫོང་སར་བཤད་གྲྭའི་མཁན་པོ་དང་དགེ་རྒན་མང་པོའི་ཞལ་སྔ་ནས། གཞུང་ཆེན་བཀའ་པོད་དྲུག་གམ། གྲགས་ཆེན་བཅོ་བརྒྱད་ཆ་ལག་དང་བཅས་པ་ལ་གསན་སྦྱོང་ཚུལ་བཞིན་མཛད།