བོད་བསིལ་ལྗོངས་མདོ་ཁམས་འབྲི་ཟླ་ཟལ་མོ་སྒང་དུ་ཨ་འགེའི་རིགས་སུ་འཁྲུངས། བཤེས་གཉེན་དམ་པ་འགྲོ་འདུལ་ཉི་མའི་མདུན་ནས་འབྲི་ཀློག་བསླབས། གཞན་ཡང་གསོ་བ་རིག་པའི་མཁས་དབང་ཀུན་དགའ་ཚེ་དབང་མཆོག་དང་། ༸མཁན་ཆེན་འཇིགས་མེད་ཕུན་ཚོགས་འབྱུང་གནས། མཁན་ཆེན་ཚུལ་ཁྲིམས་བློ་གྲོས་སོགས་མཚན་ལྡན་གྱི་དགེ་བའི་བཤེས་གཉེན་དུ་མའི་མདུན་ནས་བརྡ་དག་སྙན་གསུམ་དང་གསོ་བ་རིག་པ་སོགས་དུ་མ་མནོས།
ཤར་མི་ཉག་འབོ་གངས་དཀར་རི་བོ་ཕྱོགས་ལས་རྣམ་རྒྱལ་གྱི་མདའ་ལ་སྐྱིད་པོ་གྲོང་སྡེ་རུ་ཕྱི་ལོ་ ༡༩༨༣ ལོ་ཕ་སྐྱེས་སྟོབས་དང་མ་སེམས་མོ་གཉིས་ཀྱི་བུར་སྐྱེས། ལོ་བདུན་ནས་བཅུ་གཅིག་གི་བར་དུ་བོད་ཡིག་དང་རྒྱ་ཡིག་སོགས་ལ་སློབ་སྦྱོང་བྱས། ལོ་བཅོ་བརྒྱད་ཐོག་ཏུ་ཕ་མའི་རེ་འདུན་ལྟར་དཔལ་ལྡན་ཁམས་གསུམ་གྲགས་དགོན་དུ་ཆོས་སྒོར་ཞུགས།
བསོད་ནམས་དབང་འདུས་མཆོག་ནི་ནི་ཕྱི་ལོ་ ༡༩༨༢ ཟླ་ ༡༠ ཚེས་ ༠༥ ཉིན་ཁམས་སྐྱེ་རྒུ་མདོ་རུ་འཁྲུངས། ཆུང་དུས་ནས་རྫོང་སློབ་ཆུང་གསུམ་པ་དང་རྫོང་སློབ་འབྲིང་གཉིས་པར་འཛིན་རིམ་དགུ་པ་བར་དུ་ཕྱིན་ནས་རྒྱ་བོད་ཀྱི་སྐད་ཡིག་སོགས་ལ་སྦྱངས་པ་མཛད། ཕྱི་ལོ་ ༡༩༩༩ ལོར་སྒ་སྐྱེ་རྒུ་དགོན་དུ་ཆོས་གྲྭར་ཞུགས།
རྒྱལ་བུ་དོན་གྲུབ་མཆོག་ནི་ཏྲེ་ཧོར་དཀར་མཛེས་ཞིང་བཟང་གྲོང་སྡེ་རུ་ཕྱི་ལོ་ ༡༩༨༣ ལོ་ཕ་ཀུན་དགའ་བཀྲ་ཤིས་དང་མ་སྐལ་བཟང་སྒྲོལ་མ་གཉིས་ཀྱི་བུར་སྐྱེས། མདའ་མདོ་སློབ་གྲྭའི་ནང་དུ་ལོ་བརྒྱད་ནས་བཅུ་བཞིའི་བར་དུ་གཞི་རིམ་གྱི་སློབ་ཚན་བོད་ཡིག་དང་རྒྱ་ཡིག་ཨང་རྩིས་བཅས་ལ་སློབ་གཉེར་བྱས་པ་དང་གདོང་ཐོག་དགོན་དུའང་ཐུན་མོང་ཆོས་སྤྱོད་ཀྱི་རིགས་ལ་སློབ་སྦྱོང་བྱས།
ཚེ་རིང་འགྱུར་མེད་མཆོག་ནི་སྤྱི་ལོ་ ༡༩༨༤ ཟླ་བ་ ༠༢ ཚེས་ ༡༨ ཉིན་བོད་ཁམས་སྡེ་དགེ་འཇོ་མདའ་རྫོང་གི་ནོར་མ་གྲོང་དུ་འཁྲུངས། ལོ་དྲུག་ནས་ལོ་བཅུ་གཉིས་བར་སློབ་གྲྭ་དང་ལྗོངས་གནས་དགོན་དུ་བསླབ་སྦྱངས་མཛད་ཅིང་ལོ་བཅོ་ལྔའི་ཐོག་ཡ་ཆེན་ཨོ་རྒྱན་བསམ་གཏན་གླིང་དུ་རབ་ཏུ་བྱུང་།