མཁྱེན་རབ་དཔལ་ལྡན་མཆོག་ནི། ཡབ་ཨ་ཕོ་དང་ཡུམ་སྒྲོལ་བདེ་གཉིས་ཀྱི་སྲས་སུ་ཕྱི་ལོ་ ༡༩༧༨ ཟླ་བ་༣ ཚེས་༨ ཉིན་འཁྲུངས། ཕྱི་ལོ་ ༡༩༩༨ ལོར་རྫོང་སར་བཤད་གྲྭར་ཞུགས་ཏེ་གཞུང་ཆེན་ཁག་ལ་ཐོས་བསམ་ལོ་མང་གནང་། དགུང་ལོ་ཉེར་གཅིག་ཐོག་༸ངོར་ཀླུ་ལྡིང་མཁན་རིན་པོ་ཆེ་འཇམ་དབྱངས་བསྟན་པའི་ཉི་མ་མཆོག་གི་སྐུ་མདུན་ནས་དགེ་སློང་གི་སྡོམ་པ་ཞུས།
ངག་དབང་ཆོས་འཕེལ་མཆོག་ནི་བོད་ཁམས་སྒོམ་སྡེ་ནང་ཆེན་རྫོང་སྡོམ་པ་ཞང་རེ་བླ་རུ་ཁག་དང་པོ་ཡར་ཐང་གྲོང་དུ་སྤྱི་ལོ་༡༩༨༨ ཟླ་བ་ ༥ ཚེས་ ༡༥ ལ་འཁྲུངས། དགུང་ལོ་བཅུ་གསུམ་ཐོག་རེ་བླ་དགོན་དུ་རབ་ཏུ་བྱུང་སྟེ་ལོ་ངོ་ལྔ་ཙམ་གྱི་རིང་ཡི་གེ་འབྲི་ཀློག་དང་ཆོ་ག་ཕྱག་ལེན་ལ་ཐུགས་སྦྱོང་མཛད།
ཆོས་དབྱིངས་ལྷུན་གྲུབ་མཆོག་ནི་ཕྱི་ལོ་ ༡༩༦༤ ལོར་ཁམས་གོ་འཇོ་རུ་འཁྲུངས། དགུང་ལོ་བཅོ་བརྒྱད་ཐོག་ཐང་སྐྱ་དགོན་དུ་ཆོས་ཞུགས་མཛད། དགུང་ལོ་ཉེར་གཉིས་ཐོག་ངོར་༸ཀླུ་ལྡིང་མཁན་ཆེན་འཇམ་དབྱངས་བསྟན་པའི་སྐུ་མདུན་ནས་བསྙེན་པར་རྫོགས།
འཕགས་མཆོག་སྐུ་ཕྲེང་བདུན་པ་བསྟན་འཛིན་འཇིགས་མེད་གྲགས་པ་ནི། འབའ་རོམ་བཀའ་བརྒྱུད་ཀྱི་ཚངས་གསར་ལྷའི་གདུང་བརྒྱུད་དུ་གྲགས་པ་དང་གཏེར་ཆེན་མཆོག་གྱུར་གླིང་པའི་ཤ་བརྒྱུད་འབྲེལ་བའི་ཡབ་ཚངས་གསར་༸རྩེ་ཀེ་མཆོག་གླིང་དང་ཡུམ་བདེ་ཆེན་དཔལ་སྒྲོན་གཉིས་ཀྱི་སྲས་སུ། ཕྱི་ལོ་ ༡༩༨༡ ཟླ་ ༥ ཚེས་ ༢༥ ཉིན་བལ་ཡུལ་དུ་སྐུ་བལྟམས། སྟག་ལུང་བཀའ་བརྒྱུད་པའི་འཕགས་མཆོག་སྐུ་ཕྲེང་བདུན་པའི་ཁྲི་འདོན་མཛད།
འཇམ་དབྱངས་བསྟན་པ་མཆོག་ནི་དགུང་ལོ་ཆུང་ངུའི་དུས་ནས་ངོར་མ་དགོན་དུ་ངོར་ཀླུ་ལྡིང་མཁན་ཆེན་གྱི་དྲུང་དུ་རབ་ཏུ་བྱུང་སྟེ་ངོར་ལུགས་ཀྱི་འདོན་རྟ་དབྱངས་སོགས་ལ་སྦྱངས་པ་མཐར་ཕྱིན་པ་མཛད། དེ་རྗེས་འཕགས་ཡུལ་རྫོང་སར་བཤད་གྲྭར་ཞུགས་ནས་གཞུང་ཆེན་ཁག་ལ་སྦྱངས་པ་མཛད་ཅིང་དབུ་མ་དང་། བསྟན་བཅོས། སློབ་དཔོན་གྱི་ཕྱག་འཁྱེར་རྣམས་རིམ་པས་ཐོབ།