མཁན་རབས་བཅུ་པ།

༈ རྫོང་སར་ཁམས་བྱེ་ལྔ་རིག་ཐུབ་བསྟན་སློབ་གླིང་གི་མཁན་རབས་བཅུ་པ་མཁན་ཆེན་པདྨ་དམ་ཆོག་མཆོག

སྤྱི་ལོ་ ༡༩༣༣ ལོར་བོད་ཁམས་བྲག་གཡབ་རྔད་པ་ཞེས་པའི་གྲོང་དུ་སྐུ་འཁྲུངས། མཚན་ལ་པདྨ་མགོན་པར་གསོལ། སྤྱི་ལོ་ ༡༩༤༠ ལོ་སྟེ་དགུང་ལོ་བདུན་བཞེས་པ་ན་ཡབ་ཀྱི་དྲུང་ནས་བོད་ཡིག་སྦྱོང་བའི་དབུ་བཙུགས།

སྤྱི་ལོ་ ༡༩༤༤ ལོར་བྲག་གཡབ་གསེར་འགྱུར་རི་ཁྲོད་དུ་རྫོང་སར་མཁན་ཆེན་གཞན་དགའ་རིན་པོ་ཆེའི་དངོས་སློབ་མཁན་པོ་ཀརྨ་རྣམ་རྒྱལ་ལས་ཀློང་ཆེན་མཛོད་བདུན་གྱི་ལུང་དང་སུམ་རྟགས་གསན། ལོ་དེར་གདན་ས་ཆེན་པོ་རྫོང་སར་བཀྲ་ཤིས་ལྷ་རྩེར་རིགས་ཀུན་ཁྱབ་བདག་༸རྡོ་རྗེ་འཆང་ཆོས་ཀྱི་བློ་གྲོས་ཀྱི་གསེར་ཞལ་ཐོག་མར་མཇལ་ནས་ཡོངས་རྫོགས་དགེ་བསྙེན་གྱི་སྡོམ་པ་མནོས། རེ་ཞིག་ཡིད་ལྷུང་བྱ་རྒོད་ཚང་གི་སར་བཞུགས།

སྤྱི་ལོ་ ༡༩༤༥ ལོར་ཡིད་ལྷུང་ནས་རྫོང་སར་དུ་ཕེབས་ཏེ་༸རྡོ་རྗེ་འཆང་ཆོས་ཀྱི་བློ་གྲོས་ཀྱིས་རིན་ཆེན་གཏེར་མཛོད་ཆེན་མོ་སྩོལ་བཞིན་པ་ལས་ཕུར་པ་འཕྲིན་ལས་ཀྱི་སྐོར་ཡོངས་རྫོགས་དང་ཤེས་རབ་རྒྱས་པའི་སྐོར་སོགས་ནས་ལྷ་ཉིས་བརྒྱ་ལྷག་གི་དབང་གསན། སྤྱི་ལོ་ ༡༩༤༧ ལོར་ཁམས་བྱེ་རྫོང་སར་བཤད་གྲྭར་དངོས་སུ་ཞུགས་ཏེ། མཁན་རབས་བདུན་པ་མདོ་སྲིབ་པ་ཐུབ་བསྟན་རྒྱལ་མཚན་དང། མཁན་རབས་བརྒྱད་པ་མི་ཉག་དམ་ཆོས་འོད་ཟེར། མཁན་རབས་དགུ་པ་བྲག་གཡབ་མཁྱེན་རབ་སེངྒེ་བཅས་ཀྱི་ཞབས་པད་བསྟེན་ཏེ་པོད་ཆེན་དྲུག་དང་གཞུང་ཆེན་བཅུ་གསུམ། གྲགས་ཆེན་བཅོ་བརྒྱད་ཆ་ལག་དང་བཅས་པར་ཐོས་པ་རྒྱ་མཚོའི་ཕ་རོལ་ཏུ་སོན།

སྤྱི་ལོ་ ༡༩༥༢ ལོར་ཁམས་རབས་བརྒྱད་པ་སྐབས་དེའི་ལས་ཐོག་མཁན་རིན་པོ་ཆེ་མི་ཉག་དམ་ཆོས་སྐུ་མདུན་ནས་ཚིག་གསུམ་རིམ་ནོད་ཀྱིས་བསྙེན་པར་རྫོགས་པ་དགེ་སློང་གི་སྡོམ་པ་བཞེས། མཚན་ལུང་རིགས་སྨྲ་བའི་དབང་ཕྱུག་ཏུ་གསོལ། རྫོང་སར་བཤད་གྲྭའི་སྐྱོར་དཔོན་དང་ཟུར་འཆད་མཁན་པོ་ལོ་ ༥ གནང་། སྤྱི་ལོ་ ༡༩༥༧ ལོ་སྟེ་དགུང་ལོ་ཉེར་བཞི་པར་དགོན་ཆེན་འཛི་ཕུ་བཤད་གྲྭའི་མཁན་པོར་ཕེབས། སྤྱི་ལོ་ ༡༩༥༩ དུས་འགྱུར་གྱི་རྐྱེན་པས་ལོ་གཉིས་ཙམ་བཙོན་དུ་ཚུད། དུས་འགྱུར་གྱི་སྐབས་སུའང་སྔ་ཕྱིར་སྟག་ཚང་སྒྲུབ་བླ་ངག་དབང་མཁས་མཆོག་འོད་ཟེར་དང། ཁྲོམ་རྡོ་ཁོ་བླ་མ་ངག་དབང་ཤེས་རབ། མཁན་ཆེན་མཁྱེན་རབ་འོད་ཟེར་བཅས་ལས་ཟབ་ཆོས་དུ་མ་ལྐོག་ཏུ་འོ་རྒྱལ་ཆེན་པོས་གསན། ལྷག་པར་མཁན་ཆེན་གཞན་ཕན་སྣང་བ་དང་རྡོ་རྗེ་འཆང་ཆོས་ཀྱི་བློ་གྲོས་ཀྱི་ཞལ་སློབ་ཀླུ་ཕུག་བླ་མ་གཞན་ཕན་ལེགས་གྲུབ་མཆོག་གི་ཞབས་པད་སྔ་ཕྱི་དུ་མར་བསྙེན་ཏེ་ཐེག་མཆོག་འོད་གསལ་རྫོགས་པ་ཆེན་པོའི་ཐུན་མོང་སྔོན་འགྲོའི་རིམ་པ་ནས་བཟུང་། དངོས་གཞི་ཁྲེགས་ཆོད་ཐོད་རྒལ་ཡན་ལག་དང་བཅས་པ་དང་། ཁྲིད་ཡིག་ཆེན་མོ་ཡེ་ཤེས་བླ་མའི་ཁྲིད་སྦྱོང་རུ་ཤན་སོགས་ཉམས་ཁྲིད་དམར་བཅངས་སུ་འདེབས་པ་གསན་སྦྱང་ཤིན་ཏུ་ཞིབ་པར་མཛད།

སྤྱི་ལོ་ ༡༩༨༣ ལོར་སྡེ་དགེ་ལྷུན་འགྲུབ་སྟེང་དུ་ཞབས་པད་བཀོད་དེ་དབྱར་གནས་བསྐྱར་འཛུགས་ཀྱི་མཁན་པོ་ཐོག་མ་མཛད། སྤྱི་ལོ་ ༡༩༨༤ ལོར་ནང་ཆེན་གཙང་མདའ་དགོན་དུ་སྒྲུབ་ཐབས་ཀུན་བཏུས་ཀྱི་ཆོས་འཁོར་དང། སྤྱི་ལོ་ ༡༩༨༥ ལོར་གོ་འཇོ་ཀླུ་ཕུག་དགོན་དུ་འཆད་ཁྲིད་གནང། ལོ་དེར་འཕགས་ཡུལ་ནས་ཡང་སྲིད་ཪིན་པོ་ཆེས་རྫོང་སར་བཤད་གྲྭ་བསྐྱར་གསོ་མཛད་དགོས་པའི་གསུང་འཕྲིན་ཕེབས། དེའི་ཕྱི་ལོ་སྟེ་སྤྱི་ལོ་ ༡༩༨༦ ལོའི་བོད་ཟླ་དགུ་པའི་ཚེས་ཤར་ལ་རྫོང་སར་ནས་བསུ་མ་འབྱོར་བ་བཞིན་གདན་ས་བཀྲ་ཤིས་ལྷ་རྩེར་ཞབས་པད་བཀོད་དེ་མངའ་རིས་བླ་བྲང་དུ་འཆད་ཁྲིད་ཀྱུ་དབུ་བཙུགས་ཏེ་རྫོང་སར་བཤད་གྲྭའི་ཕྲིན་ལས་ཀྱི་ཉི་མ་སླར་ཡང་འཇིག་རྟེན་དུ་ཤར་བར་གྱུར། སྤྱི་ལོ་ ༡༩༨༨ ལོར་བཤད་གྲྭའི་འདུ་ཁང་དང་གྲྭ་ཤག་བཅས་ལེགས་གྲུབ་བྱུང་བའི་ནང་དུ་སྤོས་ཏེ་ཁམས་བྱེ་བཤད་གྲྭའི་བཤད་སྲོལ་ཏེ་གཞུང་ཆེན་བཅུ་གསུམ་དང་གྲགས་ཆེན་བཅོ་བརྒྱད་ཆ་ལག་དང་བཅས་པ་སླར་གསོ་མཛད།

སྤྱི་ལོ་ ༡༩༨༧ ལོར་ཡང་སྲིད་རིན་པོ་ཆེ་གདན་སར་ཞབས་སོར་ཐོག་མར་འཁོད་སྐབས་ཀྱེ་རྡོར་རྒྱུ་ལམ་གྱི་དབང་ཆེན་སོགས་ཟབ་ཆོས་དུ་མ་གསན། སྤྱི་ལོ་ ༡༩༩༠ ལོར་ཡང་སྲིད་རིན་པོ་ཆེ་ཆིབས་བསྒྱུར་ཐེངས་གཉིས་པའི་སྐབས་མཁན་སྤུལ་ཟུང་ནས་མཁན་པོ་ཕུན་ཚོགས་རྣམ་རྒྱལ་ཁམས་བྱེའི་མཁན་རབས་བཅུ་གཅིག་པའི་ཁྲིར་མངའ་གསོལ་ཏེ་ཁྲི་ཟུར་དུ་ཕེབས།

སྤྱི་ལོ་ ༡༩༩༦ ལོར་སྡེ་དགེ་ལྷུན་འགྲུབ་སྟེང་གི་འཛི་ཕུ་བཤད་གྲྭ་བསྐྱར་འཛུགས་མཛད་པར་འཆད་ཁྲིད་དང་གཟིགས་རྟོག་ཟླ་བ་གཉིས་རིང་མཛད་ཅིང་ཉིད་ཀྱི་གསུང་ལས་སྐྱེས་པའི་མདོ་སྔགས་རབ་འབྱམས་པ་མཁན་པོ་སྐལ་ལྡན་ཚེ་རིང་མཆོག་མཁྱེན་བརྩེའི་ཡང་སྲིད་རིན་པོ་ཆེ་དང་ལྷན་རྒྱས་ནས་ བཤད་གྲྭ་དེའི་མཁན་པོ་ཁྲི་པར་བསྐོ་བཞག་གནང། སྤྱི་ལོ་ ༢༠༠༡ ལོར་སྡེ་དགེ་ཝ་ར་ལྔ་རིག་ནང་བསྟན་སློབ་གྲྭ་དང། སྡེ་དགེ་མཁར་མདོ་བཤད་གྲྭ་གཉིས་དབུ་འཛུགས་གནང་སྟེ་མཁན་པོ་བསྐོ་བཞག་བསྩལ།

སྤྱི་ལོ་ ༡༩༩༠ ལོར་ཁྲི་ཟུར་དུ་ཕེབས་པ་ནས་སྔ་ཕྱིར་རྫོང་སར་བཀྲ་ཤིས་ལྷ་རྩེ་དང།  བྲག་གཡབ་གཙང་སར་དགོན། གོ་འཇོ་ཀླུ་ཕུག་དགོན། ནང་ཆེན་གཙང་མདའ་དགོན། ཆབ་མདོ་སྐྱོ་མདའ་དགོན། སྡེ་དགེ་འཛིང་སྦྲ་མཐོ་དགོན། ཨ་མདོ་དམར་ཐང་རྨེ་བ་དགོན། ཉག་རོང་དགོན་གསར་དགོན། གླིང་ཚང་འགུ་ཟི་དགོན་སོགས་སུ་གསུང་ངག་ལམ་འབྲས་དང་རྫོགས་པ་ཆེན་པོའི་ཉམས་ཁྲིད་ཀྱིས་མཚོན་པས་མདོ་སྔགས་ཀྱི་ཆོས་འཁོར་མང་དུ་བསྐོར། ས་པན་ལྔ་རིག་ཚོགས་ཆེན་གྱི་ཚོགས་མགོན་དུ་ཞབས་སོར་ཐེངས་གཉིས་ལ་བཀོད།

སྤྱི་ལོ་ ༢༠༠༨ ཙམ་ནས་སྐུ་བསྙུན་བཞེས་ཤིང་སྔ་ཕྱིར་སྐྱབས་རྗེ་མཁྱེན་བརྩེ་རིན་པོ་ཆེའི་བཀའ་བཞིན་པེ་ཝར་མཆོག་སྤྲུལ་རིན་པོ་ཆེ། ས་ངོར་གྱི་གདན་ས། སྡེ་དགེ་ལྷུན་འགྲུབ་སྟེང་གི་གདན་ས་སོགས་ཀྱིས་སྐུ་ཚེ་ཡུན་དུ་བརྟན་པའི་བརྟན་བཞུགས་ཕུལ། སྤྱི་ལོ་ ༢༠༡༣ ལོར་སྐྱབས་རྗེ་མཁྱེན་བརྩེ་རིན་པོ་ཆེ་གདན་སར་ཆེད་ཕེབས་གནང་བ་དང་ཡབ་སྲས་གསེར་ཞལ་མཇལ། སྤྱི་ལོ་ ༢༠༡༦ ཟླ་བ་ ༢ ཚེས་ ༢༧ ཉིན་དགོངས་པ་ཆོས་དབྱིངས་སུ་བསྡུས་སོ། །

མཛད་རྣམ་འདི་ནི་མཁན་ཆེན་གང་གི་རིགས་ཀྱི་དབོན་དང་ཆོས་ཀྱི་སྲས་སུ་གྱུར་པ་པདྨ་ཕྲིན་ལས་ཀྱིས་བྲིས་པའི་མཁན་ཆེན་མཆོག་གི་མཛད་རྣམ་ལས་བཏུས་པའོ། །